Pobreng athlete sa Tangub, champion sa steeplechase sa SEA Games

Ang kapobrehon ug ang pagdako nga walay ginikanan, dili babag sa kalamposan o sa pagkab-ot sa gusto natong kab-oton. IMG_3112

Kini ang gipamatud-an, sa makausa pa, sa usa ka batan-on nga nakatapos sa iyang pag-eskuyla, nakasulod sa Philippine Air Force, ug nakadaog ug gold medal sa duha ka higayon sa Southeast Asian Games (SEA Games) luyo sa kalisud, human sa pila ka tuig nga sakripisyo, ug bisag nahulog nga nagdako siya nga walay ginikanan.

Si Airman Second Class Christopher Ulboc Jr., residente sa Barangay 3, Tangub City ug na-assigned sa Villamor Air Base sa Pasay City, unang nahimong champion sa 3000-meter steeplechase sa 27th SEA Games sa Myanmar adtong December 2013.

Milampos siya sa pag-depensa sa iyang korona sa 28th SEA Games, nga gipahigayon sa Singapore adtong June 5-12, 2015. Iyang gipilde ang steeplechase champions sa mga nasud sa Southeast Asian Peninsula, sama sa Brunei, Cambodia, Indonesia, Myanmar, Laos, Malaysia, Singapore, Timor-Leste, Vietnam ug Thailand.

Gi-presentar si Christopher sa mga opisyal sa Tangub sa pagpanguna ni Konsehal Elnora Alngohuro, ang chairperson sa Committee on Education and Sports, ug Vice Mayor Edimar Alota sa Sangguniang Panlalawigan adtong July 9. Mi-courtesy call usab siya ni Gov. Herminia Ramiro pagkahuman sa session.

“Tungod sa kapobrehon…Pag-adto nako sa Manila, ang akong philosophy is, di ko mouli kung di ko maka-graduate. Nag-target pud ko nga makahatag ug dungog sa Tangub,” matud pa sa 24 anyos nga atleta sa dihang gipangutana siya ni Vice Gov. Aurora Virginia Almonte unsay nakapadasig niya sa pagpaningkamot.

“Misamis Occidental is proud of you. More power and God bless you always. Moabot ra nimo puhon ang among pahalipay,” matud pa ni Vice Gov. Almonte. Gipahalipayan sa bise gobernador ang local government sa Tangub, Tangub City National High School ug si coach Arnold Unabia tungod sa ilang pag-produce ug gold medalist sa SEA Games.

Sa telephone interview, giangkon ni Christopher nga elligitimate o anak siya sa pagka-dalaga sa iyang inahan. Nagdako siya sa iyang lola, nga maoy gibinlan niya sa pag-adto ug pagkaminyo sa iyang inahan sa Manila.

Sa Tangub siya nag-Grade I. Gikuha siya sa iyang inahan pagka-Grade 2 niya. Miuli siya sa iyang apohan pagka-Grade IV kay matud pa niya, “lain, awkward” ning magpuyo sa inahan nga naay laing pamilya.

Tungod sa kapobrehon, nag-working student si Christopher ug nahimong sports scholar sa local government sa iyang pag-eskuyla gikan 2003 taman sa 2007 sa TCNHS, diin siya gipailawom ug training sa steeplechase ubos ni coach Unabia.

Gipa-apil siya ni Mayor Jennifer Tan sa Fun Run sa Davao City adtong 2007. Didto siya nakit-an ug gikuha nga sports scholar sa Far Eastern University sa Manila, hangtud nga nahuman niya ang Bachelor of Science in Secondary Education human sa lima ka tuig nga pag-antos. Pagkahuman niyag eskuyla, gikuha siya sa Philippine Air Force ug gipadala sa Philippine Sports Commission sa SEA Games sa Myanmar ug Singapore.

IMG_3112“Dako kaayo among kalipay nga nakab-ot nimo ang gold medal sa SEA Games. We hope nga kanunay ka nga mag-training pa aron makab-ot pa nimo ang imong mga damgo or pangandoy,” matud pa ni Vice Gov. Almonte human sa presentation sa performance ni Christopher sa SEA Games sa ilang session adtong July 9.

“From Clarin with love…We feel very proud and happy for your success, ug dawata kining P5,000 gikan sa lungsod sa Clarin,” matud pa ni Board Member David Navarro.

Si Board Member Lovely Liezl Yape, sa iyang kabahin, nagkanayon nga ang kadaogan ni Christopher kadaogan usab sa Misamis Occidental ug sa tibuok Pilipinas. Nanghinaut siya nga himoong modelo sa mga batan-on si Christopher “aron maparehas sila nimo or more than what you have achieved.”

Share This Post: