Ang Codification sa Code of General Ordinances sa Lalawigan sa Misamis Occidental

Isip pagsanong sa gilagda sa balaod aron mapatuman ug mahimong usa ka hingpit nga balaodnon ang Codification of General Ordinances sa Misamis Occidental, ang Sangguniang Panlalawigan pinaagi sa Committee on Rules, pinanguluhan ni Board Member Lovely Liezl B. Yape, isip Chairperson, Board Member Gerard Teodorico R. Olegario II, Vice-Chairperson, Board Member Edilma C. Bulawin, Board Member Zaldy G. Daminar, ug Board Member Emeterio B. Roa, Sr. isip mga miyembro, mipahigayon ug usa ka Public Hearing niadtong Agosto 26, 2015, sa alas 9 ang takna sa kabuntagon didto sa Provincial Cultural and Farmer’s Training Center sa Kapitolyo sa Misamis Occidental.

Ang Codification usa ka hiniusang paglihok sa Executive ug Legislative sa lokal nga pangagamhanan sa sistematikong pamaagi sa pagkutlo, paghipos, pag-inventory ug pagclassify sa mga balaodnon sa tema ug gawi, pagrevise, pagsupplement ug pagconsolidate sa mga probisyon alang sa mas epektibong pagpahibalo sa publiko.

Ang maong okasyon gipaluyohan sa Bise-Gobernador Aurora Virginia M. Almonte nga mihatag sa iyang solidarity message nga gisundan sa mensahe sa Gobernador Herminia M. Ramiro nga gibasa ni Atty. Procopio C. Lao VII, OIC Provincial Legal Officer.

Lakip sa misuporta sa kalihukan mao sila si Board Member Simplicia O. Neri, Board Member Dodge L. Cabahug Sr., isip representante sa Indigenous People o IP ug Board Member Jim R. De Los Santos. Mitambong usab si kanhi DILG Regional Director ug kasamtangang konsehal sa Munisipyo sa Jimenez Mr. Loreto Bhagwani ug ang codification consultant Mr. Cedric Dayta, Secretary sa Sangguniang Bayan sa Lugait, Misamis Oriental.

Pipila sa mga mitambong sa maong panagtigom ang mga Department Heads, mga Secretary to the Sanggunians, mga konsehal sa Sangguniang Bayan/Panlungsod nga naghupot sa Committee on Rules and/or Laws, mga opisyal sa Philippine National Police o PNP, mga Presidente sa mga nagkadaiyang kahugpungan sa Probinsya sama sa Karancho, Rouser’s Club ug Consumers group.

Si Atty. Irene T. Zapatos, Secretary sa Sangguniang Panlalawigan sa Misamis Occidental mihatag sa komprehensibong overview sa Proposed Code aron masabtan pag-ayo sa publiko dili lamang ang tumong ug proseso sa maong proyekto kundili lakip na ang kamahinungdanon niini sa paghipos ug paghan-ay sa mga balaodnon diha sa Sanggunian.

Human niini, ang sakop sa Committee on Rules pinanguluhan ni Board Member Lovely Liezl B. Yape mipresentar sa mga importanteng bahin sa Code ilabi na sa Gahom sa Sanggunian sa pagreview sa mga Ordinansa ug Resolusyon gikan sa mga Sangguniang Bayan/Panlungsod.

Tungod sa mga kakulian nga di kalikayan, si Board Member Gerard Teodorico R. Olegario II nga mao untay mobatbat sa mga balaodnon kabahin sa kasanian o health wala makatungha sa maong kalihukan ug si Board Member Lovely Liezl B. Yape ang mihulip sa iyang bahin.

Si Board Member Edilma C. Bulawin nihisgot sa mga pamaagi sa paghusay sa bangi sa utlanan sa Munisipyo ug Siyudad tungod kay aduna man siyay dakong kasinatian niini kay siya man ang Chairperson sa Committee on Laws sa Sanggunian.

Ang mga importanteng balaodnon kabahin sa pagpatunhay sa kalinaw ug kaseguruhan sa katawhan maoy tahas ni Board Member Zaldy G. Daminar. Kini naglakip na sa pagpangandam batok sa terorismo, pagpatuman sa balaod batok sa paggamit sa cellphone samtang nagdrive ug sakyanan o motor o kaha naglakaw o nitabok sa dalan. Pag-angkas sa motor sa bata nga nag edad ug unom katuig paubos nga walay uban nga hingkod. Iya usab gihisgotan ang pagpatuman sa balaod nga nagmando sa paggamit sa lifeguard sa mga resort sa probinsya.

Katapusan nga mipresentar mao si Board Member Emeterio B. Roa Sr., representante sa Philippine Councilor’s League (PCL). Si Board Member Roa Sr. mihisgot kabahin sa pag institutionalize sa protocol ug sa mga importanteng hiyas sa probinsya sama sa Provincial Seal, Provincial March, mga gimbuhaton ug angayng buhaton kung motaliwan ang usa ka opisyal sa probinsya ug uban pa.     

Gisundan dayon ang maong presentasyon sa usa ka open forum kung hain ang mga katawhan nipadayag sa ilang mga pangutana, opinyon ug rekomendasyon. Pipila ka mga nangutana sa maong open forum sila si Engr. Ernesto Baz, Presidente sa Consumers group ug usa ka senior citizen, si Mr. Rosendo Requina sa Provincial Social Welfare and Development o PSWD ug uban pa.

Human matubag ang mga pangutana ug nakuha ang mga rekomendasyon sa publiko, si Mr. Bhagwani miduso alang sa pag approve sa code ug kini gidasonan ni Mr. Genaro Iyog, Secretary sa Sanggunian sa Bonifacio.

Ang public hearing nahimong malampuson sa kinatibuk-an ug natak-op human sa pag-ampo ni Ms. Cherry Clarin, Board Secretary II.

Share This Post: